الأحد، 3 نوفمبر 2013

توقيت عيد الحُب


كنت زمان بروح الكُلية في اليوم ده ألاقي البنات لابسين أحمر و الولاد كلهم موجودين على غير العادة و الورد الأحمر و الهدايا في كل حتّه, كان في بنات بيبقوا قاعدين  لوحدهم مُكتأبين, أو هيمانين, أو مستنيين, لكن أنا كنت بتفرّج :) بصراحة ماكنتش بشتاق للحُب ده, و لا كان نفسي في دبدوب و لا أرنوب, و الأحمر طول عمره بيليق عليّه و بلبسه مش مستنيّه الفلانتين, و حتى الورد كان كتير بيحاولوا يهادوني بيه و أنا كنت بكسفهم أشد كسفه و أرفض أخده, مش عشان أنا مُعقّده و لا لأني مغرورة, لكن أنا فعلاً ماكنتش عايزه الحُب ده.

لحد ما إتصالحت مع الفلانتين و قلت أهو مُناسبة حلوة نحتفل بيها و نضيف رصيد من الخروجات و الهدايا, و بمرور الوقت وقع مني الفلانتين زي ما حجات كتير وقعت, بنتغيّر آه بنتغيّر, كُنت زمان مبحبش فيلم تيتانك, كنت الوحيدة فمصر اللي مبتحبهوش, و كنت بقول عليه حُب مرتبط بشهوة, و خيانة إنها تسيب خطيبها, و مُبالغه إنه يموت عشانها, و نداله إنها تتجوز بعده, كنت بستغرب صحابي اللي دخلوه سينما مرتين و تلاته, و اقولهم رأيي الغبي "ده مش حُب"


لمّا شفته بعد سنين كتير حبيته, حسيته, فهمته, عيطت من كل مشهد بينهم و رقصت معاهم و تحررت من قيودي الكتير و تمنيت يكون عندي الجُرأة و أقف على قمة مركب و هو يكون قوّتي, و تمنيت إني أضحي بكل اللي في إيدي عشانه, عشان جنونه و حُبّه, و إنه يعلمني الحياة و الصفاقه و الجموح و الحُريّة من جديد, الفيلم ده عرفني إن مش كل اللي بنشوفه من برّه بيكون صح و إن الحقائق غبية و المنطق مش مفروض إنه يكون له وجود مع الحُب, هي ماكنتش محتجاله و لا هو كان محتاج لها, لكنهم لقوا نفسهم مع بعض.


على فكرة موته عشانها مش معجزة, أنا عندي يقين إن اللي بيحب بجد ممكن يعمل ده على الرحب و السعه و السعادة كمان, و إنها كمّلت حياتها بعده ده لأنه طلب منها إنها تموت عجوزة دافيه بين أحفادها, لكن هو فضل جوّاها محفور في قلبها و فكل تجعيدة من تجاعيد السنين عليها.

و دلوقتي أنا عرفت إن توقيت عيد الحُب مش يوم 4 نوفمبر و لا 14 فبراير, لكنه أيام تانيه بتواريخ تانيه قلوبنا عمرها ما هتنساها, هنفضل نحتفل بيها كل ما تيجي حتى لو مع نفسنا, يكفي إن يكون ده اليوم اللي قلبك إتخطف فيه و روحك إتسرقت فيه عشان يكون عيد حُب.

هناك 9 تعليقات :

Unknown يقول...

جميله جداً

وبخصوص ان احنا كلنا كنا بنروح الجامعه عشان نتفرج .. اومال مين اللي كنا بنتفرج عليهم دول , كل ما حد يجيب السيره دي يقول كنت احب اروح اتفرج :)

نيسآان يقول...

ايوا بالظبط الفقره الاخيره هي الصح كل واحد يحدد يوم فالنتاينه بنفسه :)

وانا بتمنالك انه كل يوم يبقى قلبك مليان حب .

الحسينى يقول...

أنا مرة واحدة بس أخدت وردة فى الفالنتين :D
وده لما زميلاتنا فى الجامعة قرروا يهادونا كلنا ورد فى اليوم ده :) والرسالة كانت واضحة، مش لازم الحب يرتبط بأيام، ومش لازم يوم الحب يرتبط باتنين بيحبوا بعض حب أنتي.
إنك تعمل الحاجات المعتادةبشكل مختلف، وأن مفهوم الحب ميبقاش متوقف عندك على واحد وواحدة، وأنك تعرف ان غاية الحب أنك تسعد غيرك، كلها حاجات تستحق الاحتفال :)
ملحوظة: لحد دلوقتى مش قادر أتصالح مع تايتانك بالقدر الكافى وشايف إنه أوفر رايتيد :)

شمس النهار يقول...

كل واحد ليه عيد حب غير عيد جب التاني
عيد الحب مش مناسبة محدده
عيد الحب تاريخ مرطبت بيوم محفور علي جدار الروح

رحاب صالح يقول...

صح يا شيرين
المشكلة اننا بنحصر مفهوم الحب ف نقاط غريبة جدااا
يعني مثلا لو انا بحب شخص وهو قالي انه مش بيحبني فهل ده ميبقاش حب ...؟
لا بالعكس هو حب لاني حبيت في شيء مفتقداه
طب لو حبيت شخص والظروف فرقت بينا
وكل وحد راح طريق ولسة الحب جوانا رغم السنين لبعض
بس ولا مرة اتقابلنا تاني لان الزمن والمكان اتغير ...هل بعدنا ده يخلي الحب يتغير ...
الحب بيفضل جوانا بصور مختلفة
بس احنا الي يا نخللي الصور دي حلوة يا نخليها بشعة

Hayat يقول...


"و دلوقتي أنا عرفت إن توقيت عيد الحُب مش يوم 4 نوفمبر و لا 14 فبراير, لكنه أيام تانيه بتواريخ تانيه قلوبنا عمرها ما هتنساها, هنفضل نحتفل بيها كل ما تيجي حتى لو مع نفسنا, يكفي إن يكون ده اليوم اللي قلبك إتخطف فيه و روحك إتسرقت فيه عشان يكون عيد حُب."
هابي فالنتين:D

بمناسبة عيد الحب
أحب أقولك اني بحبك جدا

http://www.imageslove.net/ar/photo/img_1368951599_957.png
دي أول مرة أقول لحد بحبك في عيد الحب هههههههههه :D

دمتِ بحب

ابراهيم رزق يقول...

روان جريح مضروب شعاع م القمر
سقط من السموات فؤاده انكســـر
جريت عليه قطه علشان تبلعــــه
أتاريه خيال شعراء و مالهوش أثر
عجبى ؟؟

الحب الحب الحب الحب
يعنى ايه حب
مش فاكر سمعت الاسم ده فين قبل كده

نتكلم جد شوية
كله يمنع الهزار
و يمنع الضحك
عمنا ابو السعود الابيارى بيقول ايه على الحب
الحب جميل .. للي عايش فيه
له ألف دليل .. أسألوني عليه

بيفوت ع العين .. ويصحيها من عز النوم
ويفوت ع الروح .. ويطير بيها الدنيا في يوم
ولما القلب يجي يفرح
ساعة ما ألاقيك قاعد جنبي
أمالي الحلوة تتمرجح
في دقة قلبك مع قلبي
وإن فات حبيبي يوم أو غاب .. أنا والظنون دايما في عتاب
واللي انشغل بهوى الأحباب .. عذابه راحة وراحته عذاب

لا اللي صفا له حبيب باله .. هدي وارتاح
ولا اللي فاته نصيبه .. نامت في قلبه جراح
لما يخاصمني بأفرح وأصور .. فرحة لقاه لو يوم جاني
وإن جه صالحني أبكي وأفكر .. من خوفي ليخاصم تاني

يا عينى عليكم يا حبيبة
يعنى نمسكه بنود الحب بند

بند 1 اللى انشغل بهواه الاحباب عذابه راحة و راحته عذاب ( هيرتاح امتى)
بند 2 لا اللى صفاله حبيبه مرتاح و لا اللى فاته مرتاح (طب مين مرتاح)
بند 3 لما يخاصمها بتبقى مستنية يصالحها و اما يصالحها بتبقى خايفة يخاصمها (طب ايه اللى هيرضيكى )
و بعدين بتقولوا الحب جميل و عاملين عيد حب
بلد مجانين صحيح

الحب ده تلاقيه كده فى اتنين كيلو كباب و كفتة داخل بيهم عليكى
فى صنية مكرونة بالبشاميل ريحتها تهفف عليك
فى كوباية عصير فريش كده و جنبها حتتين كيك
فى شوية لب و فول سودانى و انتوا بتتفرجوا على فيلم عربى قديم
و هى قاعدة بتكوى هدومك و انت قاعد جنبها بتسمع فيروز
و هى بتغسل الاطباق و انت مشغلها عبد الوهاب انا من ضيع فى الاوهام عمرى
و هى بتذاكر للعيال و انت مشغل ام كلثوم يفيد بايه يا ندم

ده ايه ده
الله اعلم بتاثير الحب التعليق كبر قوى قوى و بقى بوست
ال حب ال
بلد مجانين صحيح

Romancia يقول...

بوست اكتر من رائع
احيكى

Romancia يقول...

بوست اكتر من رائع
احيكى