الجمعة، 13 سبتمبر 2013

بداية

اللهم إني استودعتك ما علمتني إياه فرده إلي حين حاجتي إليه و لا تنسني إياه بفضلك وكرمك يا أرحم الراحمين, اللهم إلهمني و إشرح لي صدري و يسّر لي أمري و إحلل عقدةً من لساني يفقهوا قولي, اللهم تقبل هذا العمل مني و إجعل كل حرف وكلمة أكتبها خالصة لوجهك الكريم .. فلك الحمد ولك الفضل ولك الثناء الحسن .



صباحكم جوري :)
و ده أغلى صباحتي



من أيام المدرسة إتعودت أفطر على السريع عشان ألحق الطابور و فأجازة الصيف كنت بصحى العصر و مبفطرش أساساً :) في الكلية كنت بخرج من غير فطار و أكتفي بالشيبسي و البيبسي و الضحك مع أصحابي, و لما بقيت بروح الشغل إتعودت أفطر هناك مع زمايلي على السريع, و لما إتجوزت إضطريت أعمل الصبح سندوتشات سريعة كالعادة  عشان منتأخرش على الشغل و لما بقيت أم بقيت بفطّر الولاد و أشبع أنا من غلاستهم :) و أروح الشغل أتجنب الأكل التقيل و أفطر أي حاجه من السوبر ماركت على السريع برضو...لحد دلوقتي عمري ما فطرت زي ما بحلم و بتمنى..



فطار حد يجبهولي و أنا كسلانة لسه في السرير و ياريت معاه عصير فريش :)



و أشرب نسكافية مع قراية كتاب على مِهل...نفسي أعمل كل حاجة في حياتي على مِهل..



و أقف حافية في البلكونة أتنفس الصُبح مع الورد و أتفرج على الناس و أشبع من الشمس أخد منها شوية ألق..بتهيألي بعد كده ممكن أكتب و أنا مغمضه عنيّه عن كُل حاجة جميلة في الحياة..

هي أمنيات صعبة...بس مين قال إني بفقد الأمل :)

هناك 28 تعليقًا :

Hayat يقول...

أجمل بداية عزيزتي المتفائلة
و لتكن بداية خالدة
خالص تحياتي و أمنياتي بحياة طيبة :)

ياسمين خليفة يقول...

أنا بقى من الناس القليلة اللي بتحب تفطر قبل لما تنزل من البيت وماما الله يخليها هي اللي بتعملي الفطار لحد دلوقتي لو عايزه حلمك بالفطار الحلو ده يتحقق انزلي في فندق خمس نجوم

أحمد أحمد صالح يقول...

دكتورة شيرين
صباحك الأحبة والغاليين، صباحك كل ما تحلمين وكل ما تتمنين.
سأقول أهلا بك في بيتك الجديد، ونتمنى ان تحل مشكلة حدوتة مصرية في أقرب فرصة وتستطيعين إسترجاعها، ليس من أجلك فقط ومن اجل ما تحدثتي عنه هناك، بل من أجلنا نحن أيضاً، من إعتدنا وأدمنا اللقاء هناك بحروفك وما تحمل من معنى وأفكارك وما تحمل من ضياء وكلماتك وما تحوي من مشاعر.
ولكن في كل الاحوال، إذا اغلقت نافذة فهناك ألف باب قد يفتح.
ولو الحواديت اللي هناك تاه عليها المكان
فاللي بتكتبي الحواديت تنور أي مكان
وتحكي وتكتب في أي مكان وفي كل مكان
وإحنا وراها لأي مكان ولكل مكان!
..
أشكرك دكتورة شيرين
وبالتوفيق في كل مكان وفي كل زمان.

L.G. يقول...

الوان المدونة جميلة مريحة للأعصاب مبرووك العتبة الجديدة ان شاء الله تجلب معها السعادة والفرح والرضا
على فكرة راسلي الادمن بتاع موقع بلوجر والمفروض الموضع بسيط انهم يعيدوا لك السيطرة على المدونة الموضوع بسيط
دمت بكل ود
سماح

زينة زيدان يقول...

بداية طيبة جمية

سعيدة بوجودي هنا

أشكر ابراهيم رزق على اخباري بأمر مدونتك

شيرين عزيزتي دوما سنكون بالقرب

ابراهيم رزق يقول...

غمست سنك في السواد يا قلـــــــــــــــم

عشان ما تكتب شعر يقطر ألــــــــــــــــم

مالك جرالك إيه يا مجنون ... و ليــــــــه

رسمت ورده وبيت و قلب و علـــــــــــم

عجبي !!!
صباحك جورى
صباح امن من كل حقد و شر
اولا و لا يهمك الذكريات بتبقى مطبوعة جوانا قبل ما تكون مطبوعة على الورق
اينعم الواحد بيحن للعودة للذكريات و المرور بين جدرانها
لكن تبقى بلا فائدة الا اذا كانت داخلنا


نيجى بقى للجد هو الصورة اللى انتى حطاها دى فطار
يعنى حاجات بتتاكل و لا دى ديكور او لوحة تشكيلية
الفطار يعنى فووووووووووووووووووووول يعنى طعمييييييييييييييييييييييييييييييييييييييييييييييييية و تحطى بعد كده تى حاجة
انا مراتى جابت ليا عصير جريب فروت عشان الرجيم التزمت بتعليماتها بس حطيت عليه اضافة بسيطة سكر عشان احليه
و دى بقى امنيات صعبة دى امنيات بسيطة جدا
بصى كده حواليكى هتلاقى امنياتك الصعبة حققتيها

وارجع واقول
لسه الطيور بتفنّ
والنحلايات بتطنّ
والطفل ضحكه يرنّ
مع ان مش كل البشر فرحانين"

تحياتى

أمـانـى عـادل يقول...

اينما تذهبين نحن معك:))
وأسأل الله ان تستعيدى مدونتك(حدوتة مصرية)
واتمنى لك التوفيق دائما
تحياتى لكِ

Bent Men ElZman Da !! يقول...

لازم نحلم علي طول ولازم نرسم احلامنا بالمثاليه اللي بنتمناها
حتي لو الأحلام دي كانت فطار بكسل علي السرير
او كوباية نسكافية مع كتاب :)

صباحك ومساءك دايماً جوري <3

شيرين سامي يقول...

حياة العزيزة
أشكرك يا حياة على صدق إهتمامك و ذوقك
يا رب تكون بداية جيدة :)
نورتيني كتير

شيرين سامي يقول...

ياسمين خليفة:
ربنا يخليلك مامتك :)
أنا حتى لما بنزل في أوتيل بنفطر جري و في الأوبين بوفية عشان نلحق نروح البحر :)

نورتيني يا ياسمين

شيرين سامي يقول...

أحمد أحمد صالح:
:)
عايزة اقولك إني خليت مامتي تقرى التعليق من كتر ما إتاثرت بيه و قولتلها شوفتي بقى إن في ناس بتقدرني :D
بجد مش عارفه أشكرك إزاي على كلامك و إحساسك
دمت صديق و أخ عزيز
و الأماكن بتنور بالناس الصادقة و الأصدقاء اللي بجد

شيرين سامي يقول...

L.G.:

مبسوطة إن الألوان عجبتك فضلت أصمم فيها يومين بمنتهى السعادة :)
الموضوع للاسف مش بسيط زي ما إنتي متخيلة و بلوجر مالهاش أدمن نبعتله..كلها خطوات آلية لإستعادة الحساب..و أنا زهقت ناس كتير أوي و متخصصين عشان يحلوا الموضوع و لسه :)

دمتي بألف خير

شيرين سامي يقول...

زينة زيدان:

وجودك إنهاردة أكمل سعادتي :)
دمتي بود صديقتي الجميلة

شيرين سامي يقول...

إبراهيم رزق:

ربنا ما يحرمني من هداياك الشعرية :)
زهقتك في قصة المدونة..الحمد لله..أكيد كده خير و كويس إن المدونة مفتوحة و كتاباتي لسه موجوده..شكراً بجد على كلامك المشجع دائماً.
ماله الفطار حلو و أحلى ما فيه إنه في السرير :)
جريب فروت بالسكر هههههههههه
بتسعدني دايماً بوجودك
نورتني كتير

شيرين سامي يقول...

أماني عادل:

ربنا يخليكي يا أماني :)
المكان أصلاً بينور بيكم بجد
دعواتك
أرق تحية لكِ

شيرين سامي يقول...

بنت من الزمن ده:

التفاصيل الصغيرة دي من الأمنيات هي اللي بتخلي الحياة أجمل :)
نورتيني و أسعدتيني بوجودك يا دندونة

خالد يقول...

ممكن حضرتك تعملي Export لكل التدوينات اللي هناك و بعدين تعملي لها Import في مدونة جديدة هتطلع بتصميمها بتعلقياتها و كل تواريخها كمان.

Dashboard -> Settings -> Other -> Export blog

أو ممكن تكتفي بعمل Export بس مؤقتا كنسخة احتياطية تحتفظي بها على الهارد ديسك بتاع حضرتك، لأن يمكن البداية الجديدة تكون أفضل.

Mostafa gazar يقول...

ما شاء الله .....المدونه رائعه ....والألون جميله جداااااا ومن احب الألوان الى قلبى .....والصور روعة الروعه ......الى الامام دائما ....

نيسآان يقول...

بسم الله وما شاء الله .
بدايه جميله وتفتح النفس اي والله:)
مسألة الفطور من المسائل الخلافيه الكبرى في بيتنا ...انا بحب افطر اي حاجه حلوه مع القهوه او نسكافيه....بسكويت او كعك او اي نوع فطاير بالسكر ....و زوجي العزيز بيحب يفطر حمص وفول وفلافل بالتتبيله والشطه والمخلللات والذي منه....والحمدلله اننا ما بنفطرش مع بعض الا يوم الجمعه و السبت وبنفطر على كيفه
و باقي ايام الاسبوع كل واحد بيفطر على مزاجه :)

ما تفقديش الامل انتي ممكن تعملي اللي تحبيه لما تبعتي جوري عالمدرسه تبقي تاخديلك يومين اجازه ويخلالك البيت لوحدك وساعتها بس حتشعري يعني ايه حريه لمدة ساعتين تلاته بالكتير :) وبعديها ترجعي لروتين الاستغلال البشع لطاقاتك:)

aya mohamed يقول...

حبيت المدونة اوى
والبداية جميلة اوووووى
الالوان والصورة والتناغم والاحساس طبعا قبل كل حاجة
انتِ جميلة اصلا <3
ربنا يعوضك فيها خير ان شاء الله

الازهرى يقول...

مين قال مستحيلة

الحلم الوحيد المستحيل
هو اللى نعتقده كده

تحياتى على البداية الرائعة :)

Unknown يقول...

مبروك المدونه الجديده يادكتوره وخير بدايه هي الامل والتفاؤل ، الطموح لا يموت والاحلام لا تنتهي

شيرين سامي يقول...

خالد:
شكراً يا خالد بجد
و هعمل بنصايحك أكيد :)

كل الشكر و التقدير لك

شيرين سامي يقول...

مصطفى جزر:

ربنا يخليك يا مصطفى :)
المدونة نورت جداً

مبسوطه إنها عجبتك

شيرين سامي يقول...

نيسآان:

نيسان العزيزة الغالية نورتي بوجودك :)
جميل إنك بترتبي أمورك عشان ترضيه :)
للأسف نزول جوري للحضانة مش هيفرق عشان في شغل بياخد الوقت كله :(

نورتيني كتيييير

شيرين سامي يقول...

Aya Mohamed14:

ربنا يخليكي يا آيه ده من ذوقك يا فاندم :)
هي جميلة لأنها عجبتك

نورتيني و اسعدتيني بوجودك

شيرين سامي يقول...

الأزهري:

شكراً يا أسامه زيارتك هي الأروع :)

شيرين سامي يقول...

شريف:
صحيح :)
مبسوطه إنك عرفت توصل :)
نورت كتير